Озарбайжон тарихда илк бор Украина ҳудудига табиий газ етказиб берди. Бу ҳақда Украина давлат энергетика компанияси “Нафтогаз” бошқаруви раиси Сергей Корецкий расмий баёнот берди.
Унинг сўзларига кўра, газ етказиб бериш синов тариқасида Трансболқон газ йўлаги орқали амалга оширилди. Корецкий бу қадамни ҳажм жиҳатидан кичик, аммо стратегик аҳамиятга эга ва узоқ муддатли ҳамкорлик учун муҳим асос деб атади.
Мазкур ташаббус “Нафтогаз” компаниясининг Озарбайжон давлат нефть компанияси — SOCAR билан газ импортига оид илк шартнома имзолагани ортидан амалга ошди.
Украина энергетика вазири Светлана Гринчукнинг таъкидлашича, Трансболқон йўлаги — бу Украина, Молдова, Руминия, Болгария ва Туркия орқали ўтувчи йирик магистрал газ тизими бўлиб, у орқали нафақат Озарбайжон газини, балки Туркия ва Греция терминалларига етказилган суюқ газни ҳам Украина ҳудудига олиб кириш мумкин.
Вазир бу битим икки давлат ўртасида олиб борилган узоқ музокаралар ва фаол дипломатик саъй-ҳаракатларнинг натижаси эканини алоҳида таъкидлади.