Ўзбекистон ШҲТ давлатларини “яшил энергетика” масаласида бирга ҳаракат қилишга чақирди
Бугун Тошкентда ШҲТга аъзо давлатларнинг энергетика вазирлари кенгаши бўлиб ўтмоқда.
Ўзбекистон ШҲТ давлатларини биргаликда тоза ва қайта тикланувчи энергия манбаларига ўтишга чақирди. Бу ҳақда энергетика вазирининг биринчи ўринбосари Азим Ахмадхўжаев маълум қилди.
“Бир томондан доимий равишда генерацияни ошириб бориш, иккинчи томондан иқлим ўзгариши билан боғлиқ реал муаммолар инсоният олдига тоза ва барқарор энергияга ўтиш йўлларини топиш вазифасини қўймоқда”, – деган у.
Вазир ўринбосарининг фикрича, ушбу йўналишда тажриба алмашиш ва қўшма лойиҳалар муаммога ечим топиш ҳамда уларни амалиётга жорий қилиш жараёнини тезлаштиради.
Ахмадхўжаевнинг қўшимча қилишича, ушбу масаланинг ШҲТга аъзо давлатлар вазирлар кенгашида муҳокама қилиниши ташкилот давлатлари бу глобал масала устида ишлаётганидан далолат беради. У мазкур йўналишдаги ишларни тезлаштиришга чақирган.
Аввалроқ Тошкентда ШҲТ Анъанавий тиббиёт анжумани бўлиб ўтгани тўғрисида хабар берилганди.
