Ўзбекистонда букмекерлик ва тотализатор фаолияти ҳали ҳам қонуний эмаслиги маълум қилинди
Ўзбекистон ҳудудида букмекерлик ва тотализатор фаолиятини амалга ошириш учун бирор-бир хўжалик юритувчи субъектларга лицензия берилмаган. Бу ҳақда Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлиги хабар берди.
Ўзбекистон Президентининг 2019 йил 4 декабрдаги «Ўзбекистонда футболни ривожлантиришни мутлақо янги босқичга олиб чиқиш чора-тадбирлари тўғрисида»ги фармонига мувофиқ, Ўзбекистонда 2021 йил 1 январдан бошлаб Капитал бозорини ривожлантириш агентлиги томонидан лицензия олиш орқали букмекерлик фаолиятини амалга оширишга рухсат бериш назарда тутилган эди.
Шу билан бирга, онлайн қимор билан шуғулланувчи ташкилотлар, иштирокчилар мажбуриятларини тартибга солиш, келишилган ўйинларнинг олдини олиш мақсадида Капитал бозорини ривожлантириш агентлигига Маъмурий ва Жиноят кодексига тегишли қўшимча ҳамда ўзгартиришлар киритиш вазифаси юклатилган.
Маълумот учун, Капитал бозорини ривожлантириш агентлиги апрель ойининг бошида тугатилган ва унинг барча ваколатлари Молия вазирлигига ўтказилган эди.
Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлиги 2021 йил 1 январдан кучга кирган Президент фармони ижросини ўрганиш олиб борган. Шу мақсадда, агентлик март ойида Капитал бозорини ривожлантириш агентлигига сўров хати юборган.
Капитал бозорини ривожлантириш агентлиги 2021 йил 25 мартда тақдим этган маълумотда ўша вақтда лицензиялаш бўйича ҳукуматнинг қарор лойиҳалари ишлаб чиқилаётгани ҳамда Ўзбекистон ҳудудида букмекерлик ва тотализатор фаолиятини амалга ошириш учун бирон-бир хўжалик юритувчи субъектларга лицензия берилмагани қайд этилган.
«Юқоридагиларга асосланиб, Маъмурий жавобгарлик тўғрисидаги кодекснинг 191-моддасига (қимор ва таваккалчиликка асосланган бошқа ўйинлар) ва Жиноят кодексининг 278-моддаларига (қимор ва таваккалчиликка асосланган бошқа ўйинларни ташкил этиш ҳамда ўтказиш) мувофиқ букмекерлик ва тотализатор каби фаолият тури ҳали ҳам қонуний эмас», — дейилади хабарда.
Агентлик «Реклама тўғрисида»ги қонуннинг 6-моддасига (рекламага доир асосий талаблар) мувофиқ ишлаб чиқарилиши ёки реализация қилиниши қонун ҳужжатлари билан тақиқланган маҳсулот тўғрисида ахборот тарқатиш тақиқланишини эслатиб ўтган.
