Ўзбекистон Республикаси Президенти Шавкат Мирзиёев 28 ноябрь куни Бирлашган Араб Амирликлари Ҳукумат ишлари бўйича вазири Муҳаммад бин Абдуллоҳ ал-Гаргавий бошчилигидаги делегацияни қабул қилди.
Учрашув аввалида вазир БАА Президенти Шайх Муҳаммад Ол Наҳаён ҳамда мамлакат Вице-президенти, Бош вазири, Дубай амири Шайх Муҳаммад Ол Мактумнинг самимий саломи ва энг эзгу тилакларини давлат раҳбарига етказди.
Мулоқот давомида Ўзбекистон ва БАА ўртасидаги дўстлик ва стратегик шерикликни мустаҳкамлаш масалалари, шунингдек, жорий йил январь ойида олий даражадаги ташриф чоғида эришилган келишувларни изчил амалга ошириш масалалари кўриб чиқилди.
Сўнгги йилларда БАА ҳукумати билан 40 дан ортиқ йўналишда 300 га яқин ташаббус, жумладан, “Ҳукумат акселератори”, “Бир миллион дастурчи” ва “Ёш етакчилар” каби йирик дастурлар муваффақиятли амалга оширилгани алоҳида мамнуният билан қайд этилди.
Давлат бошқаруви самарадорлигини ошириш бўйича ўзаро ҳамкорликнинг янги беш йиллик дастурини кенг кўламда ҳаётга татбиқ этиш муҳимлиги таъкидланди.
Шу билан бирга, бюрократияни қисқартириш, сунъий интеллект соҳасида 5 миллион нафар промпт-муҳандисни тайёрлаш жараёнида БААнинг илғор тажрибасини жорий этиш, шунингдек, “Ёш авлод” ва “Китоб челленжи” лойиҳаларини амалга ошириш режалари муҳокама қилинди.
Учрашув якунида Президент Шавкат Мирзиёев ва вазир Муҳаммад ал-Гаргавий Ўзбекистон — БАА муносабатлари тарихига бағишланган махсус кўргазма билан танишдилар.