13 нафар ўзбекистонлик Туркманистон орқали Эрондан ватанга қайтарилди
Фуқаролар Ашхобод шаҳридаги элчихона ходимлари томонидан "Сарахс" туркман–эрон чегара пости орқали мамлакатга кузатиб қўйилган.
"Дунё" ахборот агентлигининг маълум қилишича, Ўзбекистон Ташқи ишлар вазирлиги Эрондан Туркманистон ҳудуди орқали Ўзбекистонга қайтаётган фуқароларга ёрдам бермоқда.
Хабарга кўра, Ўзбекистоннинг Ашхободдаги элчихонаси Эрон Ислом Республикасидаги ваколатхона, Туркманистон Ташқи ишлар вазирлиги ва бошқа ваколатли идоралар билан ҳамкорликда фуқароларни чегарада кутиб олиш, виза ва транспорт масалаларини ҳал этиш ҳамда Ватанга хавфсиз қайтариш учун зарур чораларни кўрмоқда.
Натижада, 13 нафар Ўзбекистон фуқароси Ашхобод шаҳридаги элчихона ходимлари томонидан "Сарахс" туркман–эрон чегара пости орқали мамлакатга қайтарилган.
Шунингдек, 2026 йил 2 мартдан Туркманистон–Эрон давлат чегарасидаги "Гаудан–Бажгиран", "Артик–Лютфабад", "Акяйла–Инчебурун" ва "Олтин Асир–Инчебурун" назорат-ўтказиш пунктлари фаолияти қайта тикланди.
Элчихона ходимлари “Гаудан–Бажгиран” пунктида Ўзбекистон фуқароларини кутиб олмоқда ва автотранспорт воситалари сафарбар қилинган.
Фуқаролар мурожаати учун Ўзбекистоннинг Туркманистондаги элчихонаси ходимлари телефон рақамлари:
+993 64 78-04-44 – Жасур Ашуров
+993 64 99-34-58 – Жамшид Буриев
+993 62 20-49-56 – Жасур Ахмедов (консул)
