Ўзбекистоннинг АҚШ билан савдо ҳажми 1 млрд доллардан ошди

 

 

Президент Шавкат Мирзиёевнинг Вашингтонга амалий ташрифи доирасидаги учрашувлар АҚШ савдо вазири Ховард Латник билан музокаралардан бошланди. Учрашувда Ўзбекистон–АҚШ стратегик шериклигини янада мустаҳкамлашнинг амалий жиҳатлари, шунингдек, устувор йўналишларда қўшма кооперация лойиҳаларини илгари суриш масалалари атрофлича муҳокама қилинди.

 

Томонлар Қўшма Штатлар Ўзбекистоннинг муҳим савдо-иқтисодий шерикларидан бири эканини алоҳида қайд этдилар. Сўнгги йилларда ўзаро савдо ҳажми 1 миллиард доллардан ошгани, мамлакатимиз бозорида АҚШнинг қарийб 340 та компанияси фаолият юритаётгани таъкидланди. Энергетика, стратегик аҳамиятга эга минераллар, транспорт, қишлоқ хўжалиги, ахборот технологиялари ва бошқа соҳаларда йирик қўшма лойиҳалар изчил амалга оширилмоқда.

 

Музокараларда қиймати 35 миллиард долларга тенг уч йиллик Иқтисодий ҳамкорлик дастурининг самарали ижроси муҳим экани қайд этилди. Шунингдек, ишбилармонлик тадбирлари доирасида бир қатор муҳим келишувлар имзоланиши кутилаётгани билдирилди. Устувор лойиҳаларни тизимли қўллаб-қувватлаш мақсадида ташкил этилган Ишбилармонлик кенгаши имкониятларидан кенг фойдаланиш ва Инвестиция платформасини ишга тушириш зарурлиги алоҳида таъкидланди. Савдо муносабатларини кенгайтириш ҳамда Ўзбекистон ҳудудлари билан тўғридан-тўғри ишбилармонлик алоқаларини ривожлантириш масалаларига ҳам эътибор қаратилди.

 

Ташриф доирасида давлат раҳбари АҚШ молия институтлари раҳбарлари билан ҳам учрашув ўтказди. Хусусан, АҚШ Экспорт-импорт банки президенти ва раиси Жон Ёванович ҳамда Халқаро молиявий тараққиёт корпорацияси (ДФС) бош ижрочи директори Бен Блек билан музокараларда савдо-инвестициявий ҳамкорликни кенгайтириш истиқболлари кўриб чиқилди. Ўтган йили АҚШ президенти Доналд Трамп билан бўлиб ўтган музокаралар икки томонлама иқтисодий алоқаларга қўшимча туртки бергани таъкидланди.

 

Эксимбанк билан ҳамкорлик доирасида йирик саноат ва инфратузилмавий лойиҳаларни молиялаштиришни кенгайтириш, юқори технологияли ускуналар етказиб беришни қўллаб-қувватлаш устувор йўналишлар сифатида белгиланди. ДФС раҳбарияти билан суҳбатда инвестициявий ҳамкорлик механизмларини мустаҳкамлаш, молия бозори ва энергетика тармоғини ривожлантиришга қаратилган йирик миллий ҳамда минтақавий лойиҳаларда корпорация иштирокини кенгайтириш масалалари муҳокама қилинди.

Шунингдек, Ўзбекистон томони АҚШ ишбилармон доираларини Тошкент халқаро инвестиция форумида фаол иштирок этишга таклиф этди. Учрашувлар якунида давлат раҳбари ҳузурида Ўзбекистон ва АҚШ ўртасида Инвестиция платформасини ташкил этиш тўғрисидаги битим алмашилди.