АҚШ президенти Доналд Трамп Россия етакчиси Владимир Путин, Украина президенти Владимир Зеленский ва АҚШ иштирокидаги уч томонлама музокаралар яқин орада бўлиб ўтиши мумкинлигини айтди. Бу ҳақда Оқ уй раҳбари Бедминстерда (Нью-Жерси) бўлиб ўтган суҳбат чоғида журналистларга маълум қилди.
АҚШ президентининг фикрича, Путин ва Зеленский ўртасидаги кучли нафрат сабаб учрашувда воситачиликни ўзи олиб боришига тўғри келади.
“Музокара жараёнини ўзим олиб боришимга тўғри келади. Улар бир-бирини жудаям ёмон кўради, шунинг учун бунга аралашишим зарур”, — дея таъкидлади Трамп.
Трамп, шунингдек, учрашув формати ҳали ҳам муҳокама қилинаётганини, бироқ у албатта АҚШнинг бевосита иштирокида бўлиб ўтишини таъкидлади. Президент бўлажак маслаҳатлашувларнинг асосий вазифаси Россия-Украина можаросини ҳал қилиш йўлларини излаш ва минтақада хавфсизликни таъминлаш бўйича янги ечимларни ишлаб чиқиш бўлишини айтди.