Шароф Рашидов тумани ҳокими 10 минг доллар пора олаётганда қўлга олинди
Шунингдек, ДХХ тезкор тадбирида Гулистон шаҳар прокурори ўринбосари ҳам ўз хизмат хонасида 10 минг АҚШ доллари билан ушланди.
Давлат хавфсизлик хизмати томонидан ўтказилган тезкор тадбирлар натижасида Жиззах вилояти Ш.Рашидов туман ҳокими ва Сирдарё вилояти Гулистон шаҳри прокурори ўринбосари пора олишда гумон қилиниб қўлга олинди.
Расмий маълумотларга кўра, Ш.Рашидов туман ҳокимлигининг қурилиш ва коммунал хўжалик масалалари бўйича бўлим бош мутахассиси тадбиркор ишончини қозониб, мактаб қурилиши учун ажратилган 1,7 гектар ер майдонига кўп қаватли уйлар қурилишига рухсат олиб бериш эвазига $30 минг пора талаб қилган. 5 июль куни у сўралган пулнинг $10 мингини олиб, туман ҳокимига етказган. 8 июль куни эса қолган $20 мингни олиб, рухсат ҳужжатларини тадбиркорга тақдим этаётган пайтда ДХХ ходимлари томонидан ҳоким билан бирга ушланган.
Мазкур ҳолат юзасидан туман ҳокими депутатлик дахлсизлигидан маҳрум қилинди ва унга Жиноят кодексининг 210-моддаси, бош мутахассисга эса 168 ва 211-моддалари асосида жиноят иши қўзғатилди.
Сирдарёдаги ҳолатда эса Гулистон шаҳар прокурори ўринбосари Бўёвут туманида қишлоқ хўжалиги фаолияти билан шуғулланувчи МЧЖ раҳбаридан жиноят иши доирасида унга нисбатан “қамоқ” эҳтиёт чорасини қўлламаслик ва ишни фойдаси йўналишида ҳал қилиш эвазига $10 минг пора сўраган. У ушбу пулни хизмат хонасида олаётганида, ДХХ томонидан далиллар билан қўлга олинган.
Ҳар икки мансабдор шахсга нисбатан жиноят ишлари қўзғатилиб, ҳозирда уларга нисбатан “қамоқ” эҳтиёт чораси қўлланиб, тергов ҳаракатлари давом этмоқда.
