Сурхондарёда 15 ёшли қиз турмушга берилди
Расмий огоҳлантиришларга қарамай, жорий йилнинг 10-август куни тўй ўтказилган.
Сурхондарё вилоятининг Денов туманида вояга етмаган қизнинг турмушга чиқарилгани ҳолати аниқланди. Бу ҳақда Ижтимоий ҳимоя миллий агентлиги маълум қилди.
Маълум қилинишича, 2025 йил июл ойида маҳалла раҳбари ва ижтимоий соҳа мутаассадилари 15 ёшли қизнинг ота-онаси тўй ўтказишга ҳозирлик кўраётгани ҳақида хабар топган. Текширув ўтказилиб, ота-оналарга бундай амалиётнинг ноқонуний экани ва вояга етмаган шахсларни турмушга бериш тақиқланиши юзасидан расмий огоҳлантириш берилган.
Шунга қарамай, 2025 йил 10 август куни тўй маросими ўтказилган. Натижада маросимни ташкил этган шахсларга қонунчиликка мувофиқ жарима қўлланилди.
Қонунчиликка кўра, Ўзбекистон Республикасида никоҳ ёши эркаклар ва аёллар учун 18 ёш этиб белгиланган. Айрим истисно ҳолларда, суд қарори билан уни бир йилга камайтириш мумкин. Бироқ 15 ёшда турмуш қуриш мутлақо ман этилади ва болаларнинг ҳуқуқларини қўпол равишда бузиш ҳисобланади.
Ижтимоий ҳимоя миллий агентлиги болаларнинг ҳуқуқларини таъминлаш, уларни зўравонлик ва мажбурий никоҳ ҳолатларидан ҳимоя қилиш давлат сиёсатининг устувор йўналиши эканини таъкидлади. Агентлик бундай ноқонуний амалиётларга қатъий қарши чора кўрилишини, маҳаллий органлар ва ҳуқуқни муҳофаза қилувчи идоралар билан ҳамкорликда тизимли профилактика ишлари давом эттирилишини билдирди.
