Тайвань яқинида юк кемаси ҳалокатга учради
Унинг ичида саккиз киши бўлган.
22 март куни Тайвань қирғоқларида юк кемаси чўкиб кетди. Бу ҳақда Тайвань марказий ахборот агентлиги хабар берди.
Унга кўра, кема Prestige деб номланган ва Мўғулистонда рўйхатга олинган. У Тайвандан 90 километр узоқликда ҳалокатга учраган. Ҳозирда маҳаллий ҳокимият бу жойдан кемаларни айланиб ўтишини маслаҳат берган.
Ҳодиса вақтида кема бортида саккиз экипаж аъзолари бўлган. Уларнинг етти нафари Индонезия, бир нафари эса Тайвань фуқаролари.
Қутқарув операцияси пайтида Индонезия фуқаролари хавфсиз жойга етказилган. Ҳалокат вақтида уларнинг яқинида бўлган япон кемаси уларни қутқаришга муваффақ бўлган. Экипажнинг саккизинчи аъзоси бедарак йўқолган. Уни қидириш ишлар давом этмоқда.
Эслатиб ўтамиз, аввалроқ Хитой кемаси Япония билан баҳсли ҳудудга кириб қолгани тўғрисида хабар берилганди.
