Тошкент шаҳар солиқ бош инспектори олган порасини қайтариб бераётганда ушланди
8,7 млрд сўмлик солиқни бекор қилиш эвазига пул талаб қилган.
Тошкент шаҳар жиноят ишлари бўйича Мирзо Улуғбек туман судида кўриб чиқилаётган, Сурхондарёда рўйхатдан ўтган тўқимачилик маҳсулотлари ишлаб чиқарувчи МЧЖ мансабдорларига оид жиноят иши доирасида олиб борилган текширув давомида корхонага қўшимча 8,7 миллиард сўм солиқ ҳисобланган.
Суднинг жорий йилнинг 15 сентябрь куни ушбу корхонада қайта текширув ўтказиш бўйича ажрим чиқарганидан сўнг, Тошкент шаҳар Солиқ бошқармасининг Солиқ аудити бўлими бош инспектори қайта тафтиш жараёнида қўшимча ҳисобланган солиқни бекор қилиб беришни ваъда қилиб, МЧЖ вакилларидан 5 минг АҚШ доллари олган.
Бироқ у 8,7 миллиард сўмлик солиқ қарорини тўлиқ бекор қилишга эриша олмагач, илгари олган пулларни тадбиркорлик субъекти вакилларига қайтараётган вақтида Давлат хавфсизлик хизмати ходимлари томонидан далиллар билан қўлга олинган.
Ушбу ҳолат юзасидан мансабдор шахсга нисбатан Жиноят кодексининг 210-моддаси (пора олиш) 2-қисми «в» банди билан жиноят иши қўзғатилди ва унга нисбатан «қамоқ» эҳтиёт чораси қўлланилди.
Ҳозирда тергов ҳаракатлари давом этмоқда.
