Тошкент туманида фуқаро ИИБ ходимини пичоқлаб қўйди
Ҳолат юзасидан расмий маълумот берилди.
Ижтимоий тармоқларда Тошкент туманида профилактика инспектори пичоқлаб кетилгани айтилган хабарлар тарқалмоқда. Ҳолат юзасидан ИИББ расмий муносабат билдирди.
Қайд этилишича, 8 апрель соат 21:10 ларда Тошкент тумани Қорасарой МФЙда яшовчи, 1968 йилда туғилган фуқаро қ.Ж. маст ҳолда уйида жанжал қилаётганлиги сабабли, шошилинч чақирувга асосан воқеа жойига етиб борган туман ИИБ профилактика катта инспектори подполковник Мурод Халиқов 56 ёшли фуқарони тинчлантираётганида у фаол қаршилик кўрсатиб, қўлидаги пичоқ билан инспекторнинг чап бел қисмига уриб жароҳат етказган.
Натижада тунги хизмат вақтида жароҳат олган профилактика инспектори ИИВ Марказий госпиталига ётқизилган. Фуқаро процессуал тартибда ушланган ва дастлабки терговга қадар текширув ҳаракатлари прокуратура органлари томонидан олиб борилмоқда.
