Тошкентда мактаб ўқувчилари муштлашди
Жанжал оқибатида тан жароҳати олганлар бор.
Тошкент шаҳрининг Чилонзор туманида мактаб ўқувчилари жанжаллашди. Ҳолат юзасидан шаҳар ИИББ расмий маълумот берди.
Ҳолат 23 май куни соат 11:00 ларда Чилонзор туманида жойлашган мактаблардан бирининг олдида юз берган. Унда 10-синф ўқувчилари — 2006 йилда туғилган A.X. ва Д.Ў. шу мактабнинг 9-синф ўқувчилари — 2007 йилда туғилган Ш.Э. ва И.Т.лар билан ўзаро келиб чиққан келишмовчилик сабабли жанжаллашган. Жанжал оқибатида Ш.Э. ва И.Т.лар тан жароҳати олиб, шифохонага ётқизилган.
Ўтказилган суд-тиббий экспертизанинг хулосасига кўра, Ш.Э. ва И.T.ларга соғлиқни қисқа муддатга бузилишига олиб келган енгил тан жароҳати етказилганлиги аниқланган.
Мазкур ҳолат юзасидан Чилонзор тумани ИИО ФМБ ҳузуридаги Тергов бўлими томонидан Ўзбекистон Республикаси Жиноят кодексининг 109-моддаси 2-қисми билан жиноят иши қўзғатилган. Тергов давом этмоқда.
