АҚШ президенти Доналд Трамп бугун Россия президенти Владимир Путин билан Украина уруши бўйича телефон орқали мулоқот ўтказишни режалаштирмоқда. Трампнинг айтишича, суҳбатда урушдаги қирғинни тўхтатиш масаласи муҳокама қилинади. У Россия билан боғлангач, Украина президенти Владимир Зеленский ва НАТОдаги иттифоқчилари билан ҳам алоқага чиқмоқчи.
Ушбу фон остида АҚШ ва Европа давлатлари Кремлга нисбатан босимни кучайтирмоқда. Буюк Британия, АҚШ, Германия, Франция ва Италия раҳбарлари телефон орқали музокара ўтказиб, Россия ўт очишни тўхтатиш ва тинчлик музокараларига жиддий ёндашмаса, унга қарши санкциялар жорий этилиши мумкинлигини муҳокама қилган.
Британиянинг расмий баёнотида айтилишича, бу суҳбатда Германия канцлери Фридрих Мерс, Британия бош вазири Кир Стармер, Франция президенти Эммануэл Макрон, АҚШ президенти Доналд Трамп ҳамда Италия бош вазири Жоржия Мелони иштирок этган.
Европа ва АҚШ расмийларининг фикрича, дипломатик босим Россияни урушни тугатишга ундаши мумкин.