“Шу ҳафтада жамоатчилик орасидан машҳур депутат “UzAuto Motors” харидорларига муддатидан олдин “Chevrolet Cobalt” автомобилини ўриндиқ иситкичи модулисиз топшириш ҳақидаги қарорига нисбатан очиқчасига даъво билан чиқди. Унинг фикрича, биргина опсиясиз юзлаб “Cобалт” автомобиллари зарур яримўтказгичлар келгунигача компания омборида қолиши керак”.
“UzAuto Motors”нинг муносабатига кўра, депутатни харидорларнинг фикри қизиқтирмайди. Компаниянинг 1 миллион сўмлик компенсация тўлаш позицияси харидорларга танлов ҳуқуқини беради. Ё ўриндиқ иситкичи опсиясиз 1 млн. сўм билан автоуловни қабул қилиш ёки етишмаётган деталнинг етказилишини кутиш.
Хабарда тўлиқ комплектацияли автмобилни етказиб бериш муддати ўз кучида қолиши таъкидланган.
Компания расмийлари депутатнинг қонун бўйича жарима ундириш ҳақидаги фикрига шундай жавоб беради:
“Яримўтказгич компонентининг етишмовчилигига тўхталадиган бўлсак, вазият форс-мажор бандига тўғри келади. Форс-мажор ҳолатлар юзага келганда жарималар кўзда тутилмаган.
Автомобилни харид қилиш шартномасида 2.4 банди бор. Унда истеъмолчи тўловни тўлиқ қайтариш шарти билан маҳсулот харидидан воз кечиши, алмаштириши ёки комплектация ўзгаргани учун қайта ҳисоб-китоб қилиши кўрсатилган.
Сўнгги танлов харидорда қолади. Истеъмолчи ҳуқуқи ҳурмат қилинади”.
“UzAuto Motors” Расул Кушербаевнинг танқидида "урғу" берилган жумласига ҳам эътибор қаратди:
“Ҳурматли депутат ўриндиқ иситкичи модулисиз бериладиган автомобилни “брак” деб атади.
Қўшимча опсиянинг йўқлиги яроқсиз ҳисобланмайди. Ушбу қонунда “брак” (яроқсиз) сўзининг ўзи умуман йўқ.
Халқ сайлаган депутат “брак” (яроқсиз) сўзи билан маҳсулотдаги етишмовчиликни назарда тутган кўринади.
"Истеъмолчилар ҳуқуқларини ҳимоя қилиш тўғрисида"ги қонуннинг 19-моддасига биноан – маҳсулотдаги етишмовчилик – бу маҳсулотни тўла мақсадли ишлатилишидаги камчиликдир”.
Компания депутатга “ҳурматли депутат, ўриндиқ иситкичисиз автомобилдан фойдаланиб бўлмайдими?” - дея савол беради. Сўнг уни "қонунни ўзи ўқимаганликда" айблайди.
“Нотўғри талқин қилиши, ўзбошимчалик билан хулоса чиқариши, фуқароларни чалғитиши “UzAuto Motors” эскпертларида халқ депутати ўз мамлакатининг қонунчилигини билишига жиддий шубҳа уйғотди.
Шундай қилиб, бирор бир депутат норматив ҳужжатларни ўзича талқин қилиб, ихтиёрий ёки беихтиёрий равишда аҳолини норозиликка чақиришга қанчалик ҳақли?”, – қабилидаги савол билан компания мазкур баёнотини якунлаган.
Аввалроқ монополист компания истеъмолчилар ҳуқуқларини бузишда давом этаётгани ва Кушербаев яна “UzAuto Motors” масаласига қайтгани ҳамда “UzAuto Motors” “Chevrolet Lacetti”ларини нега дон омборларида сақлаётгани ҳақида хабар берилганди.
Оламгир Абдиев