Унинг фикрича, мазкур тадбир бир қатор саволларни келтириб чиқаради.
“Биринчидан, истеъмолчига компания яримўтказгич топа олдими-йўқми қизиғи йўқ. У ҳақини тўлаган, вассалом.
Компания нега бошқа мамлакатлар автомобиль саноатига ўхшаб, аввал автомобилни ишлаб чиқариб, кейин сотувга чиқармаяпти? Нега йўқ нарсага олдиндан пул олади?
Иккинчидан, компаниянинг истеъмолчига кўрсатмаган хизмат ёки бермаган товари учун олдиндан ҳақ тўлаб ишлаши ҳалол ва қонунийми?
Учинчидан, компания нуқсонли товар бергани ёки истеъмолчига вақтида товарни бермагани учун неустойка(пеня) ҳам тўлаши керак. Бунинг ҳисоб-китоби борми?” – дея саволларни ўртага ташлаган депутат.
Кушербаев постининг шу жойида бир нечта қонун моддаларини келтириб ўтган.
“Истеъмолчиларнинг ҳуқуқларини ҳимоя қилиш тўғрисида”ги Қонуннинг 19-моддасида “Нуқсонлар белгиланган муддатда бартараф этилмаган, шунингдек, иш бажаришни (хизмат кўрсатишни) бошлаш ва тугаллаш кечиктирилган тақдирда, ижрочи истеъмолчи ҳар бир кечиктирилган кун, соат (агар муддат соатларда белгиланган бўлса) учун иш (хизмат) қийматининг ёки буюртма қийматининг (агар унинг қиймати алоҳида белгиланмаган бўлса) бир фоизи миқдорида неустойка (пеня) тўлайди”, деган норма бор.”
Оддий айтганда, кимдир 100 миллион сўмлик автомобилга пул тўлади-ю, автомобиль айтилган комплектасияда бўлмаса ёки вақтида ҳаридорга етказиб берилмаса, ҳар ўтказиб юборилган кун учун унга 1 миллиондан пул тўланади. Агар 100 кун кечикса 100 миллион тўлайди, – дейди Кушербаев.
“Айтганча, шу қонун нормасини компанияга янги келган ҳорижлик бош директоргаям билдириб қўйишса яхши бўларди.
Юқоридагилардан келиб чиқиб, Монополияга қарши курашиш қўмитаси ҳузуридаги Истеъмолчилар ҳуқуқларини ҳимоя қилиш агентлигига айни ҳолатни ўрганиб, истеъмолчиларни ҳимоя қилиш масаласида расман сўров киритдик.
Истеъмолчиларга нисбатан бундай камситувчи муносабат учун Агентликдан кескин чора кутиб қоламиз. Судлар ҳам бу сафар истеъмолчи ҳуқуқига кўз юммас. Зеро, Ўзбекистон — ҳуқуқий давлат!” – дея фикрларини хулосалаган депутат.
Аввалроқ “Ўзбеклар нега ўз машинасини минолмаяпти?” — депутат Кушербаев мавзуга эътибор қаратгани, “UzAuto Motors” маълумотни нотўғри талқин қиладиганларга муносабат билдиргани ҳамда "Chevrolet" бренди автомобилларининг чет элдаги нархлари ҳақида хабар берилганди.
Оламгир Абдиев