Унда айтилишича, деярли тайёр машиналар чип келишини кутмоқда. Заводда эса уларга жой етмаяпти.
Компания маълумотларига кўра, “Асака” заводида ҳар куни 250-300 та “Chevrolet Lacetti” автомобили ишлаб чиқарилади. Бироқ электрон компонентларнинг етишмаслиги сабабли уларни истеъмолчиларга юбориб бўлмаяпти.
Ҳатто кичик бир деталнинг йўқлиги ҳам тайёр маҳсулот ишлаб чиқаришга имкон бермайди. Шу боис деярли тайёр автомобиллар омборга жўнатилмоқда.
Заводда тайёр машиналар учун жой тугаганлиги сабабли компания "Ўздонмаҳсулот" билан машиналарни вақтинчалик сақлаш тўғрисида келишиб олган.
Янги электрон қисмлар келиши билан автомобилларга ўрнатилади. Шундан сўнг харидорларга етказилиши айтилмоқда.
Маълумот учун: йил бошидан бери жаҳон иқтисодиёти яримўтказгичлар танқислигига дуч келди. Автомобиль ишлаб чиқарувчи компанияларнинг ҳеч бири ана шундай муаммодан четда қолмади. Мисол учун “АвтоВАЗ” радио- магнитофонсиз машиналар ишлаб чиқаришни йўлга қўйди. GM эса АҚШдаги заводлари ишини тўхтатди.
Микросхемалар муаммоси Ўзбекистонга ҳам таъсир кўрсатди. Шу боис “UzAuto” март ойи бошида автомобилларни етказиб бериш кечикиши ҳақида огоҳлантирганди. Электрон қисмлар етишмаслиги, ишлаб чиқариш платформасининг янгиланиши туфайли ёзда автомобиль ишлаб чиқариш кескин камайди. Август ойига келиб завод атиги иккита Лаcетти ишлаб чиқарган.
Минглаб одамлар автомобилни сотиб олиш учун навбатга ёзилган. "Ўзавтосавдо" ботидан олинган маълумотга қараганда, 14 октябрь ҳолатига кўра “Chevrolet Lacetti” учун навбат 37 080 тани ташкил қилган. – деб изоҳ берилади “Spot.uz” сайтида.
Бундан аввал "UzAuto Motors" "Spark" ва "Lacetti" автомобилларини вақтинча ишлаб чиқариш тўхтатилганлиги ҳақидаги маълумотни тасдиқлагани, автосалонларда юзлаб шартнома тузиб қўйиб, «навбат» сотаётганларни инсофга чақираётгани ҳамда “Chevrolet Lacetti” автомобили ишлаб чиқариш ҳажмини оширилгани ҳақида хабар берилганди.
Оламгир Абдиев