Мактабгача ва мактаб таълими вазирлиги ҳузуридаги Республика “Баркамол авлод” болалар мактаби иш фаолиятини янгича асосда ташкил этиш, бу борадаги жаҳон тажрибасини ўрганиш ва амалда қўллаш, мавжуд тўгаракларни замонавий ўқув жиҳозлари билан таъминлаш, тўгараклар сони ва сифатини ошириш мақсадида халқаро ҳамкорлик ва алоқларни янада кенгайтиришга интилмоқда. Республика “Баркамол авлод” болалар мактабида айни шу мақсадда “Шарқ аёли” халқаро хотин-қизлар жамоат фонди ҳамда Россия Федерациясининг “Омега” IT компанияси вакиллари иштирокида музокара учрашуви ташкил этилди.
Айни пайтда Республика “Баркамол авлод” болалар мактаби тизимида 219 та мактаб фаолият кўрсатяпти. 7 йўналишдаги 11 минг 431 тўгаракда 386 минг 143 нафар ўқувчилар ўзлари қизиққан соҳа бўйича олаётган билимларини амалиёт билан уйғунлаштирмоқда, касб-ҳунар ўрганмоқда, - дейди мактаб директори Севара Маҳмудова. – Сир эмас, бугунги кунда ёшларимизда ахборот технолoгияларига бўлган қизиқиш ва интилиш тобора ортиб бормоқда. Шу боис биз ИТ ҳамда “Робототехника” тўгаракларини ривожлантириш, улар фаолиятига халқаро тажрибани татбиқ этиш, соҳадаги янгиликлардан ўқувчиларимизни мунтазам хабардор қилиб бориш ва уларни амалиётга жорий қилишни мақсад қилганмиз. Бугунги учрашув доирасида “Шарқ аёли” халқаро хотин-қизлар жамоат фонди воситачилигида Россия Федерациясининг “Омега” IT компанияси билан ҳамкорлик қилишга келишиб олдик. Бу эса, ўз навбатида, "Баркамол авлод' болалар мактаблари тўгарак аъзоларига янги имконият ва шароитларни тақдим этади.
Эслатиб ўтамиз, бугунги кунда Мактабгача ва мактаб таълими вазирлиги ҳузуридаги Республика “Баркамол авлод” болалар мактаби 3 та халқаро, 15 та маҳаллий идора ва ташкилотлар билан меморандум тузиб, яқиндан ҳамкорлик қилиб келмоқда.