Япония яна тўртта Россия банкининг активларини музлатиб қўяди
Канада эса Россияга қарши янги санкциялар киритди.
Япония ҳукумати Украинадаги вазият туфайли Россиянинг яна тўртта молиявий институтининг активларини музлатиш тўғрисидаги қарорини эълон қилди. Бу ҳақда Молия вазири Шунъичи Сузуки маълум қилди, деб ёзади “Interfaks-Ukraina”.
У чекловларга дучор бўлган банкларни номлади — ВТБ Банк, Откритие Банк, Совcомбанк ва Новикомбанк. Санкциялар апрел ойи бошида кучга киради.
Бунгача Токио Россиянинг учта банки — Россия, Промсвязбанк ва ВЕБ.РФ активларини музлатиб қўйганди. Европа Иттифоқи Россиянинг етти банкини SWIFT тизимидан ажратгани хабар қилинган эди. Шунингдек, Канада ҳукумати "Роснефт" ва "Газпром"нинг юқори мансабдор шахсларига нисбатан шахсий санкциялар киритади. Бу ҳақда Канада ташқи ишлар вазири Мелани Жоли маълум қилди, деб ёзади ДW Канада ташқи ишлар вазирлигига таяниб. Қайд этилишича, Россия энергетика соҳасидаги икки муҳим компания — "Роснефт" ва "Газпром"нинг 10 та асосий шахсига нисбатан янги чеклов чоралари жорий этилмоқда.
