Ельцин ва Путиннинг собиқ тансоқчиси ўз жонига қасд қилди
У Россия “ядро чамадони”га жавобгар шахс бўлгани айтилмоқда.
Москва вилоятида Путиннинг шахсий қўриқчиси бўлиб ишлаган офицер ўз жонига қасд қилди. Бу ҳақда “Московский комсомолец” хабар берди.
20 июнь куни Красногорск шаҳрида ўз квартирасида 53 ёшли Федерал қўриқлаш хизматининг собиқ полковниги Вадим Зиминнинг ярадор топилди. унинг сўнгги иш жойи божхона хизмати бўлгани айтилмоқда. Бундан бир қанча вақт олдин Зимин пора олишда гумонланган ва уй қамоғида сақланаётганди. Ҳозирда собиқ зобит кома ҳолатида ва врачлар унинг ҳолатининг ижобий эмаслигини айтмоқда.
“МК” билан суҳбатлашган Зиминнинг танишлари унинг алоқачи бўлиб хизмат қилганини ва кўплаб “қайноқ нуқта”ларда ишлаганини маълум қилган. у оғир операцияларни бошдан кечиргани ва бошига титан пластинаси қўйилгани қайд этилган. Шундан сўнг Зимин Федерал қўриқлаш хизматига ўтказилган, бу ерда полковник унвонигача хизмат қилган. суҳбатдошларнинг сўзларига кўра, у Россиянинг биринчи президенти Борис Ельциннинг алоқа хизмати ходими бўлган ва “ядро қутиси” учун жавобгар ҳисобланган. Истеъфога чиққанидан сўнг Марказий божхона бошқармасида тендер комиссияси раиси лавозимида ишлаган.
Зиминнинг ўзи сўнгги иш жойида раҳбари алмашганидан сўнг унга нисбатан жиноий суриштирув бошланганини айтган. Янги раҳбарият ундан ўз хоҳишига кўра ишдан кетишни талаб қилган, аммо собиқ офицер рад жавобини берган.
Айрим маълумотларга кўра, унга икки ҳолат бўйича айблов қўйилган: 20 минг рубль ва телефон кўринишида ҳамда мигрантдан 3 минг рубль миқдорида пора олиш. Шу билан бирга Зиминнинг яқинлари август ойида суд уни оқлаши мумкинлигини таъкидлаган.
19 июнь куни Доғистондан унинг акаси келган ва адвокатдан иш бўйича маълумотларни сўраган. Зимин акасининг банк картасидан 10 минг рублга алкоголь сотиб олган ва 20 июнь куни ўз жонига қасд қилиш нияти борлигини айтган. Акаси уни бундан қайтаришга ҳаракат қилган ва бундан буён ёрдам бериб туришини маълум қилган. Шундан кейин Зимин бошқа хонага ўтган ва бир қанча вақтдан сўнг ҳушсиз ҳолда топилган.
Собиқ зобитнинг турмуш ўртоғи ҳозирда Украинадаги қуролли низо ҳудудида бўлиб турибди. Унинг сўзларига кўра, Зимин сўнгги вақтларда у билан телефон орқали мулоқот қилганда, камбағаллигидан шикоят қилган. У иши ва даромадини йўқотиб қўйгани учун депрессия ҳолатида бўлган.
