Samarqandda qarzdor ota farzandlariga 260 million so‘m aliment to‘ladi
Samarqand viloyati Kattaqo‘rg‘on shahrida qarzdor ota farzandlariga 260 million so‘m aliment to‘ladi.
Maʼlum qilinishicha, Fuqarolik ishlari bo‘yicha Kattaqo‘rg‘on tumanlararo sudining qarori bilan fuqaro Q.F.dan undiruvchi S.N.ga ikki nafar farzandning moddiy taʼminoti uchun daromadning uchdan bir qismi miqdorida aliment undirish belgilangan.
Bu holat bo‘yicha MIB Kattaqo‘rg‘on shahar bo‘limi tomonidan ijro ishi yuritilgan. Ammo qarzdor ota anchadan buyon aliment to‘lovlarini to‘lamasdan kelgan.
Hozirda muqim daromadi bo‘lmagan, kam taʼminlangan va ijtimoiy himoyaga muhtoj aholini qo‘llab-quvvatlash naqadar muhim ekanligini inobatga olgan holda, Byuroning shahar bo‘limi xodimlari tomonidan tushuntirish va profilaktik tadbirlar amalga oshirilmoqda.
Shundan so‘ng, MIB xodimlari qarzdor Q.F. bilan tushuntirish ishlari o‘tkazib, farzandlarni moddiy qo‘llab-quvvatlash har bir otaning burchi ekani yotig‘i bilan tushuntirilgan.
Bundan o‘ziga to‘g‘ri xulosa chiqargan qarzdor ota shu kuni farzandlari taʼminotini o‘ylab, ular voyaga yetguniga qadar hisoblangan 260 million so‘m pulni birdaniga to‘lab bergan. Tomonlarning roziligi bilan mazkur ijro hujjati tegishli tartibda tugatilgan.
