Litva Belorusni yuzlab migrantlarni mamlakat hududiga yuborishda ayblamoqda
Litvalik mansabdorlarning aytishicha, qochoqlar avval Bag‘dod va Turkiya shaharlaridan Minskka yetib oladi, so‘nggi kunlarda ular Belorus-Litva chegarasidan o‘tishgan. Litva bosh vaziri mamlakat chegarada to‘siq o‘rnatishi va u yerga harbiylarni joylashtirishini eʼlon qildi.
Chorshanba kuni Litva TIV Belorus elchisini chaqirib, Minskdan noqonuniy migrantlar oqimini to‘xtatishni talab qilgan. Chegara xizmati maʼlumotiga ko‘ra, iyul oyining dastlabki 7kunida chegaradan 799 nafar noqonuniy migrant o‘tgan. 2021 yilning dastlabki 6 oyida ularning soni 636 tani tashkil etardi.
26 may kuni Belorussiya prezidenti Aleksandr Lukashenko endi uning davlati Yevropa Ittifoqining g‘arbiy chegaralarini kesib o‘tmoqchi bo‘lgan migrantlarga to‘sqinlik qilmasligini eʼlon qilgan. Bu Ryanair samoletining Minskda majburan qo‘ndirilgani tufayli g‘arb eʼlon qilgan sanksiyalarga Belorusning javobi bo‘ldi.
Maʼlumot uchun, 23 may kuni Afinadan Vilnyusga uchayotgan Ryanair samoleti Minskda majburan qo‘ndirilgan edi. Aviakompaniya samolyot Minskda qo‘nishiga sabab Belorus dispecherlari layner bortida potensial xavf borligi haqida ogohlantirgani ekanini eʼlon qildi. Keyinchalik samolyotda bomba borligi haqidagi maʼlumot tasdiqlanmadi.
Shu reys bilan uchayotgan NEXTA axborot portali asoschisi Roman Protasevich va uning dugonasi, Rossiya fuqarosi Sofya Sapega samolet qo‘nishi bilan qo‘lga olingan.
