Rossiya tashqi ishlar vaziri O‘zbekistonga keladi
Rossiyaning O‘zbekistondagi elchixonasi axborot xizmati xabariga ko‘ra, Rossiya tashqi ishlar vaziri Sergey Lavrov 15–16 iyul kunlari Toshkentda bo‘lib o‘tadigan «Markaziy va Janubiy Osiyo: mintaqaviy bog‘liqlik. Tahdidlar va imkoniyatlar» xalqaro konferensiyasida ishtirok etish uchun O‘zbekistonga keladi.
Maʼlum qilinishicha, mazkur xalqaro konferensiya davomida mintaqalararo hamkorlik masalalarini ko‘rib chiqish rejalashtirilgan bo‘lib, unda O‘zbekiston rahbaridan tashqari Afg‘oniston prezidenti, Pokiston bosh vaziri, Markaziy va Janubiy Osiyo mamlakatlari, boshqa xorijiy davlatlarning tashqi ishlar vazirlari va yuqori darajadagi vakillari, xalqaro va mintaqaviy tashkilotlar, global moliyaviy institut va kompaniyalar, yetakchi ilmiy-tadqiqot va tahliliy markazlarning rahbarlari ishtirok etadi.
Rossiya elchixonasi maʼlumotlariga ko‘ra, 16 iyul kuni Toshkentda Qirg‘iziston, Qozog‘iston, Rossiya, Tojikiston, Turkmaniston va O‘zbekiston tashqi ishlar vazirlarining to‘rtinchi uchrashuvi ham bo‘lib o‘tishi rejalashtirilgan bo‘lib, unda tomonlar mintaqaviy xavfsizlik, giyohvand moddalar savdosi va terrorizmga qarshi kurashish sohasidagi o‘zaro aloqalarni muhokama qiladi.
