Toshkent xalqaro aeroporti estakadasi 10 iyuldan test rejimida ochiladi

 

 

Estakada bo‘ylab avtotransport vositalari harakati 2021 yil 10 iyuldan test rejimida ishga tushadi.

 

Kompaniyadagilarning taʼkidlashicha, estakada maydoni — umumiy platforma uzunligi — 110 metr, eni — 9,5 metr bo‘lib, u barcha avtotransport vositalarining o‘tishiga imkon bermaydi. Shu sababli test davrining birinchi bosqichida uchish terminaliga o‘tish qismini Toshkent xalqaro aeroporti bilan shartnoma imzolagan litsenziyaga ega taksilar, O‘zbekiston Turizm va sport vazirligining arizasiga ko‘ra, turistik avtobuslar hamda mikroavtobuslar, VIP va Business Lounge orqali xizmat ko‘rsatiladigan xorij delegatsiyalari avtotransportlari uchun ochish rejalashtirilmoqda.

 

Estakada bo‘sh joy bo‘lsa, avtomatik ravishda ochiladigan shlagbaumlar (har bir polosaga), yo‘l to‘siqlari (antitaran), bo‘sh joy borligi yoki yo‘qligi to‘g‘risida maʼlumot beruvchi tablo, avtotransport vositalaridagi yot predmetlarni aniqlash uchun mo‘ljallangan skaner (har bir polosaga), shuningdek, navbatchi operator uchun avtomatlashtirilgan nazorat kuzatuv punkti bilan jihozlanadi.

 

Butun estakada bo‘ylab transport vositalarining raqamlarini taniydigan, turini aniqlay oluvchi va ular tomonidan yo‘l harakati qoidalariga rioya qilinishini nazorat etuvchi intellektual videokuzatuv kameralar tizimi o‘rnatilgan. Keyinchalik avtoulovlarning davlat raqamlarini tanib olish texnologiyasi hamda naqd va naqd pulsiz to‘xtash joyi uchun to‘lovlarni амалга oshirish имконини beradigan zamonaviy avtomatlashtirilgan to‘xtash tizimini joriy etish rejalashtirilgan.

 

Toshkent xalqaro aeroportiga estakada orqali o‘tish qoidalari

 

Estakadaning o‘ng liniyasi turistik avtobuslar va mikroavtobuslar uchun mo‘ljallangan;

Estakadaning chap liniyasi taksilar harakati uchun mo‘ljallangan;

Turistik avtobus va mikroavtobuslar uchun estakada bepul, harakatlanish hamda yo‘lovchilarni qisqa muddatda tushirish vaqti 10 daqiqadan oshmaydi, belgilangan vaqtdan o‘tib ketsa, har 10 daqiqa uchun to‘lov undiriladi;

Taksilar uchun estakada bepul harakatlanish hamda yo‘lovchilarni qisqa muddatda tushirish vaqti 10 daqiqadan oshmaydi, belgilangan vaqtdan o‘tib ketsa, har 10 daqiqa uchun to‘lov undiriladi;

O‘ng va chap liniyalarni ajratib turuvchi sariq chiziqni bosish taqiqlanadi va uni bosish qoidabuzarlik hisoblanib, jarima tayinlanadi.

Toshkent xalqaro aeroporti direktori Mirzohid Tursunovning taʼkidlashicha, estakadada bir vaqtning o‘zida 30 tagacha yengil avtomobil yoki turistik avtobus bilan birga, 17 tagacha yengil avtomobil tura oladi. «Bu juda kamligini bilamiz… shu sababli qo‘shimcha sharoitlarni tashkillashtiryapmiz, mavjud avtoturargohni test rejimida bepul ochishimiz mumkin. Pastda ham shu sxema bo‘yicha ishlanadi — avtomobillar uchun 5 daqiqa va avtobuslar uchun 10 daqiqa bepul (yo‘lovchilarni tushirish uchun)», — deydi u.