O‘zbekistondagi barqaror rivojlanish Janubiy Koreyada eʼtirof etildi
O‘zbekistonda olib borilayogan iqtisodiy islohotlar va ularning natijalari haqida Janubiy Koreyaning yetakchi miya markazlaridan biri Koreya Respublikasi Xalqaro iqtisodiy siyosat instituti (KIEP) saytida “O‘zbekistonning barqaror ijtimoiy-iqtisodiy rivojlanish tendensiyalari” sarlavhali tahliliy maqola eʼlon qilindi.
Bu xaqda O‘zA maʼlumot bermoqda. Maqolada O‘zbekiston bugungi kunda dunyodagi iqtisodiyoti tez rivojlanayotgan sanoqli davlatlardan biri ekanligi qayd etilgan. Markaz maʼlumotlariga ko‘ra o‘n yil mobaynida respublikaning yalpi ichki mahsuloti o‘sish surʼatlari MDH mamlakatlarining (Rossiya, Qozog‘iston, Belarus, Qirg‘iziston, Tojikiston) o‘rtacha ko‘rsatkichidan oshib ketgan. Maqolada 2017 yilda boshlangan iqtisodiy islohotlar jarayonining o‘ziga xos xususiyatlari, amalga oshirilgan muhim qadamlar va iqtisodiy islohotlarni chuqurlashtirish maqsadida qabul qilingan qonunlar, jumladan, korrupsiyaga qarshi kurashish to‘g‘risidagi qonun, 2017-2021 yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi va boshqa uzoq muddatli dasturlar qabul qilinganiga eʼtibor qaratilgan. Shuningdek ,pandemiya davrida O‘zbekiston iqtisodiy o‘sish dinamikasini saqlab qolganligi eʼtirof etilib, ishsizlikning keng tarqalishining oldi olinganligi qayd etilgan. “Qo‘shnilar bilan aloqalar yaxshilanib, ko‘plab mamlakatlar bilan tashqi savdo kuchaydi, bu esa valyuta bozorini liberallashtirish va tashqi savdo yo‘lidagi to‘siqlarni kamaytirishga ko‘maklashdi”, deb yozadi mualliflar.
