Mavlud Chovusho‘g‘li Farg‘onaga keldi
Bugun, 14 iyul kuni Turkiya Respublikasi tashqi ishlar vaziri Mavlud Chovusho‘g‘li O‘zbekistonga tashrif buyurdi. Mehmonning samolyoti Farg‘ona xalqaro aeroportiga qo‘ngan.
Avval xabar berganimizdek, 15-16 iyul kunlari Toshkentda bo‘lib o‘tadigan «Markaziy va Janubiy Osiyo: mintaqaviy o‘zaro bog‘liqlik. Tahdid va imkoniyatlar» mavzusidagi xalqaro konferensiyada ishtirok etish uchun mamlakatimizga kelgan Turkiya tashqi ishlar vaziri Mevlyut Chavushog‘lu o‘z safarini Farg‘onadan boshladi.
Yuqori martabali mehmonni aeroportda Madaniyat vaziri Ozodbek Nazarbekov hamda Turizm va sport vazirining birinchi o‘rinbosari Ulug‘bek Aʼzamov kutib oldi. Tashrif davomida ularga shuningdek ikki tomonning favqulodda va muxtor elchilari hamrohlik qilmoqda.
Kutib olish marosimidan so‘ng Mavlud Chovusho‘g‘li Marg‘ilondagi hunarmandchilik markazi tomon yo‘l oldi.
Bu Mavlud Chovusho‘g‘lining O‘zbekistonga ikkinchi tashrifi bo‘lib, bundan oldin u 2021 yilning 6-9 mart kunlarida Xiva, Samarqand, Buxoro va Toshkent shaharlarida bo‘lgan.
Tashrif rejasiga ko‘ra, kun davomida Turkiya tashqi ishlar vaziri Marg‘ilondagi Hunarmandlar markazini hama Oltiariq tumanidagi uzumchilik bog‘larini borib ko‘radi, Qo‘qondagi Xudoyorxon saroyi hamda Jome majmuasi bilan tanishadi.
Mevlyut Chavushog‘lu bugun kech soatlarda Farg‘onaga tashrifini yakunlab, ertaga boshlanadigan xalqaro konferensiyada ishtirok etish uchun Toshkentga uchib ketadi.
