Germaniyada kuchli suv toshqini oqibatida 58 kishi qurbon bo‘ldi, 1300 kishi bedarak yo‘qolgan
Germaniya g‘arbidagi Arvayler okrugi hokimiyati kuchli suv toshqinidan so‘ng mingdan ortiq odamning bedarak yo‘qolganini xabar qildi.
Dushanbadan beri yog‘ayotgan kuchli yomg‘ir suv toshqiniga sabab bo‘ldi.
"Ayni paytda 1,3 ming kishi bedarak yo‘qolgan. Birgina Bad-Noyenar-Arvayler shahrida tongda mingga yaqin chaqiruv bo‘lgan, qutqaruv operatsiyalari hozirgacha davom etmoqda. Murakkab vaziyat tufayli holat yuzasidan yakuniy xulosa qilishning hozircha imkoni yo‘q", - deyiladi okrug matbuot xizmati xabarida.
Arveyler okrugida 130 ming odam yashaydi.
Dushanba kunidan beri Germaniya janubi-g‘arbida kuchli yomg‘ir kuzatilmoqda. Reyna Ar, Mozel, Zauer, Pryum, Nims, Kil, Erft daryolari o‘zanidan chiqib ketgan.
Germaniyada favqulotda vaziyat qurbonlari soni 58 nafarga yetdi.
Kansler Angela Merkel tabiiy ofatdan ko‘rilgan zarar bir necha kunda aniqlanishini eʼlon qildi.
