AQSH kosmosdagi infratuzilmasini himoya qilish uchun dunyo bo‘ylab josuslik bazalarini quradi
AQSH kosmosdagi Rossiya va Xitoy tahdidlariga qarshi turish uchun dunyoning turli burchaklarida uchta josuslik bazasi tashkil etishni rejalashtirmoqda. Bu haqda «Sky News» xabar berdi.
Maʼlum bo‘lishicha, bazalar Shotlandiya, AQSHning Texas shtati va Avstraliyada qurilishi rejalashtirilgan. Ulardan birinchisi 2025 yilda ishga tushirilishi aytilgan.
Jurnalistlarning yozishicha, bazalar Rossiya yoki Xitoy kabi davlatlarning sunʼiy yo‘ldoshlarga hujum qilishga urinishini kuzatib borish uchun kerak bo‘ladi.
Taʼkidlanishicha, ular 36 000 kilometrgacha bo‘lgan masofadan futbol to‘pi o‘lchamidagi moslamalarni aniqlay oladigan radar texnologiyasi bilan jihozlanadi.
«Bu kerak, chunki biz orbitada tizimlarimizga tahdid solishi mumkin bo‘lganlarni doimiy ravishda kuzatib borishni istaymiz», — degan AQSH kosmik kuchlari podpolkovnigi Jek Uolker.
Buyuk Britaniyaning Qirollik kuchlari rahbari Mayk Uigston baʼzi mamlakatlarda Yerdan orbitadagi nishonlarni ura oladigan lazerlar hamda boshqa sunʼiy yo‘ldoshlarga xalaqit berishi mumkin bo‘lgan moslamalar ishlab chiqilayotganini taʼkidlagan.
«Biz kosmosdagi muhim infratuzilmani himoya qilishga tayyorgarlik ko‘rishimiz kerak. Hozirda Rossiya va Xitoy kabi sunʼiy yo‘ldoshlarga xavf tug‘diradigan tizimlarni rivojlantirayotgan mamlakatlar mavjud», — deb taʼkidlagan u.
