Olimlar o‘rgimchak zaharidan yurak xurujiga qarshi dori yaratdi
Avstraliyalik olimlar o‘rgimchak zahari asosida miokard infarktiga uchragan odamlarning hayotini saqlab qolish hamda donor yuraklarning umrini uzaytiradigan dori yaratishdi.
Maʼlumki, yurak xurujidan so‘ng yurakka qon quyilishi kamayadi, bu esa yurak mushagida kislorod yetishmasligiga olib keladi. Kislorod yetishmasligi hujayra muhitini kislotali qiladi va molekulyar darajada organizm yurak hujayralariga o‘lim signalini yuboradi.
Bir necha o‘n yillar davomida tadqiqotchilar yurak hujayralarida "o‘lim signalini" to‘xtatadigan dori ishlab chiqara olmay kelayotgan edi. Ammo Kvinslend universiteti va Yangi Janubiy Uels universiteti Yurak tadqiqotlari instituti mutaxassislari Freyzer orolidagi o‘rgimchak zahari tarkibidagi Hi1a oqsilining yurakdagi kislota sezgir ion kanallarini to‘sib qo‘yishini, o‘lim signalining oldini olishini aniqladilar.
Natijada hujayralardagi o‘lim xavfi kamayadi va yurak xurujiga uchragan bemorlarning tirik qolish darajasi oshadi. Bundan tashqari Hi1a oqsili asosida yaratilgan dori donor yuraklarning umrini sezilarli darajada uzaytirishi mumkin.
Hozirda olimlar Hi1a oqsilini inson yurak hujayralarida sinab ko‘rishmoqda va ular kelajakda to‘laqonli klinik sinovlarni o‘tkazishni rejalashtirmoqdalar.
Nasiba To‘xtayeva
