Bayden va Putin musulmonlarni Qurbon hayiti bilan tabrikladi
Bugun, 20 iyul kuni Qurbon hayiti munosabati bilan AQSH Prezidenti Jo Bayden va mamlakat birinchi xonimi Jill Bayden hamda Rossiya Federatsiyasi Prezidenti Vladimir Putin butun dunyo musulmonlarini tabrikladi.
“Jill va men butun dunyo bo‘ylab Qurbon hayitini nishonlayotganlarga o‘zimizning eng samimiy salomlarimizni yuboramiz”, deyiladi bayram tabirigi kirish qismida.
AQSH Prezidenti Haj ziyorati va Qurbon hayiti anʼanalari, ayniqsa, bu yil — koronavirus pandemiyasi tufayli vujudga kelgan qiyinchiliklar davrida juda ahamiyatli ekanini qayd etgan.
“Amerika xalqi butun dunyo bo‘ylab COVID-19‘ga qarshi kurashda yarim milliarddan ortiq vaksinani hayriya qilib, yetakchilik qilishdan faxrlanmoqda. Hayotlarni saqlab qolish va har qanday joyda pandemiyaga barham berish uchun barchamiz birgalikda harakat qilishimiz kerak”, deyiladi xabarda.
Tabrikda Haj ziyorati haqida ham so‘z borib, u tenglik timsoli sifatida taʼriflangan hamda Qo‘shma Shtatalarda ham ushbu ziyoratni amalga oshirishni istovchi minlab amerikaliklar borligi qayd etilgan.
“Amerika xalqi nomidan biz barchaga xavfsiz va ajoyib bayramni tilaymiz. Hayit Muborak”, deyiladi tabrik so‘ngida.
“Aziz do‘stlar! Sizlarni Qurbon hayiti bayrami bilan tabriklayman. Ildizlari asrlarga borib taqaladigan ushbu qadimiy bayram dindorlarni Islomning kelib chiqishi va qadriyatlariga jalb qiladi, rahm-shafqat, adolat va taqvodorlikka, boshqalarga nisbatan ehtiyotkorlik va samimiy munosabatda bo‘lishga chaqiradi. Barcha jahon dinlari negizida joylashgan ushbu yuksak gumanistik, axloqiy ideallar qudratli birlashtiruvchi kuch bo‘lib xizmat qiladi, jamiyatda millatlararo totuvlikni mustahkamlashga va madaniy xilma-xillikni, xalqimizning o‘ziga xos anʼanalarini saqlashga xizmat qiladi”, deyiladi Prezident Putin tabrigida.
Putin o‘z tabrigida Rossiya musulmonlariga sog‘lik, baxt va esguliklarni tilashini bildirgan.
Maʼlumot uchun, islom dini Rossiya Federatsiyasida xristianlikdan keyin ikkinchi o‘rinda turadi. Mamlakatdagi musulmonlarning aniq soniga hali aniqlik kiritilmagan va hamon muhokamalar davom etib keladi. 2002 yildagi aholini ro‘yxatga olish natijalariga ko‘ra, Rossiyadagi anʼanaviy musulmon aholi soni taxminan 14,5 million kishi.
