Avgust oyida yana qanday shov-shuvli voqea rejalashtiriyapti?
Joriy yilning 19 iyul sanasida AOKAda O‘zbekiston Respublikasi Innovatsion rivojlanish vazirining axborot siyosati masalalari bo‘yicha maslahatchisi Nazokat Abduqunduzova ishtirokida brifing bo‘lib o‘tdi. Brifingda davlatimiz rahbarining uzum yetishtirish, uni sanoat usulida qayta ishlashni rivojlantirish borasidagi yig‘ilishida qo‘yilgan vazifalar, bu sohadagi istiqbolli loyihalar va amalga oshirilayotgan ishlar yuzasidan maʼlumot berib o‘tdi.
Shuningdek, brifingda yoshlarning innovatsion ishlanmalari qay tartibda rag‘batlantirilayotganligi haqida ham alohida to‘xtalib o‘tildi.
– Yoshlarning innovatsion ishlanmalari qay tartibda rag‘batlantirilyapti va qancha qismi amaliyotda qo‘llanmoqda?
– Yoshlarning ilmiy, startap loyihalarinini qo‘llab-quvvatlash maqsadida 50 milliard so‘m mablag‘ ajratilgan. Bu mablag‘larni munosib nomzodlarga yetkazish uchun tanlovlar muntazam o‘tkaziladi. Masalan, 2020 yilning eng yaxshi 20 ta startap loyihasi, turli marafonlar tartibida, Texnoveys, “Tekurban Uzbekistan” nomli tanlovlar o‘tkazganmiz. Bu yil ham “Bo‘lajak olimlar” katta tanloini tashkillashtiryapmiz. Bunda yosh olimlarga 100 milliongacha bo‘lgan summalar ajratiladi. Mazkur tanlov ikki yo‘nalishda: birinchi, startap loyihalari, ikkinchisi, yoshlarning innovatsion g‘oyalari.
Hozirda tanlovning birinchi bosqichi yaʼni arizalarni qabul qilish ishlari yakunlandi. Ayni kunlarda “Akademik harakatchanlik” nomli tanlovimizga qabul jarayonlari 31 iyulga qadar belgilangan va hujjatlar qabuli davom etmoqda. Bunda ham asosan yoshlar o‘zlarining loyihalari bilan qatnashib, O‘zbekiston yoki xorijdagi eng nufuzli laboratoriyalarda ishlash imkoniga ega bo‘lishadi. Faqat o‘qish bilan emas, o‘z ishlanmalarini ilmiy tadqiqot institutlarida yana-da takomillashtirishlari mumkin.
– Yangi qurilgan yo‘llarda ko‘p o‘tmasdan deformatsiyalar kuzatilmoqda. Bunga biror innovatsion g‘oya tatbiq etiladimi?
– Yo‘llarning shakl o‘zgartirish holati ularning ost qismidan o‘tgan eski kanalizatsiya quvurlaridan suv sizib chiqishida. Shu paytga qadar birgina Toshkent shahrining o‘zida 1500 dan ko‘p teshiklar aniqlangan. Hozirda Isroil davlatining “Maya international” kompaniyasi bilan hamkorlikda sunʼiy yo‘ldosh texnologiyalari yordamida kosmosdan turib yerosti suvlarining sizib chiqishini aniqlashni yo‘lga qo‘yganmiz. Agarda quvurlarda shu kabi texnik nosozliklar aniqlansa, maxsus texnologiyalar orqali bartaraf etiladi va quvurlar yana 50 yilgacha ishlab bera oladi.
– Xabaringiz bor, yaqinda “NazarX” loyihasida o‘zbekistonlik yigit kosmosga o‘z ayerostatini uchirdi. Istiqbolda yana shunday rejalar bormi?
– Ziyodilla ismli yigit bizga videolarini taqdim etdilar va ushbu loyihaga 100 million so‘m miqdorida pul ajratildi. Hozirda mazkur aerostatning takomillashtirilgan versiyasi yaratildi va u vazirligimizda turibdi. Xudo xohlasa, avgust oyida uchirishni rejalashtirganmiz. Undan tashqari, yana shov-shuvli voqea ham qilmoqchimiz, u hozircha sir. Nasib etsa, uni ham avgust oyida maʼlum qilamiz.
Zayniddin Norquvvatov
