Bosqinchiga psixiatrik ekspertiza tayinlandi
Bugun Ukraina Vazirlar Mahkamasi binosiga kirib, binodagi odamlarni portlatish bilan tahdid qilgan erkak kishi haqida xabar bergan edik.
Erkakning tanishi u bilan muzokara olib borayotgan vaqtda politsiyachilar uni xavfsizlantirishdi va binodan olib chiqishdi.
Aniqlanishicha, uning ismi Vladimir Proxnich bo‘lib, u ayni paytda Kiyevning Irpen shahrida tadbirkorlik bilan shug‘ullanadi.
Proxnichni 2015 yilda Petr Poroshenko 3 darajali “Mardlik” ordeni bilan taqdirlagan.
Maʼlumotlarga ko‘ra, Vladimir Proxnich 1978 yilda tug‘ilgan. U Lugansk viloyatining Schastye shahrida xizmat qilgan. IIV manbasining aytishicha, u “Aydar” batalyonida sapyor bo‘lgan va urushda bosh miyasidan jarohat olgan.
Proxnich o‘zining Facebook sahifasida Irpenga qo‘shni bo‘lgan Bucha shahrida fuqarolik faoliyati bilan shug‘ullanishini bildirgan. Uning sahifasida "Buchanskaya varta" tashkilotining surati ham bor.
Tashkilot yetakchilaridan biri - Vasiliy Olesyuk bugun u bilan muzokara olib borib, taslim bo‘lishga ko‘ndirdi.
Ukraina prokuraturasi Vladimir Proxnichning harakatlari sababi haqida qisqa maʼlumot berdi: unda aytilishicha, Proxnich hukumat ishi va sobiq harbiylarning moliyaviy ahvolidan norozi bo‘lgan.
IIV rahbari Denis Monastirskiyning so‘zlariga ko‘ra, terrorchiga psixiatrik ekspertiza tayinlandi.
Agar ekspertiza uni aybsiz deb topsa, sobiq harbiy qamoq jazosidan qutulib qolishi mumkin.
Sharofat Mahmudova
