O‘zbekiston Qozog‘istonda 5 ming o‘rinli yangi masjid qurmoqda
Qozog‘istonning Turkiston shahriga kiraverishda O‘zbekiston hukumati tomonidan masjid qurilmoqda. Bu haqda Turkiston viloyati hokimligi matbuot xizmati xabar berdi.
«Bunday diqqatga sazovor joyning qurilishi qo‘shni O‘zbekistonning Turkistonga sovg‘asi bo‘lib, uni kelasi yili yakunlash rejalashtirilgan. Arxitekturasi o‘ziga xos bo‘lgan Islom markazining ichki va tashqi bezaklari sharqona uslubda amalga oshirilgan. Yangi loyiha har tomonlama o‘rganib chiqilgan. Jahonning eng yaxshi tajribalari inobatga olingan», — deyiladi xabarda.
Yangi masjid 5 ming kishiga mo‘ljallangan bo‘lib, umumiy maydoni 20 000 kvadrat metrni tashkil qiladi.
Qayd etilishicha, masjid zamonaviy talablar asosida qurilmoqda, shuningdek, inshoot poydevorini mustahkamlash uchun uning o‘ziga xos texnologiyasi ishlab chiqilgan.
