Efiopiya isyonchilari tarixiy shaharni egallab olganliklarini daʼvo qildi
Efiopiyada isyonchi Tigray xalq ozodlik fronti (TXOF) Amxara viloyatidagi tarixiy Lalibela shahrini egallab olganini daʼvo qildi. Bu haqda Anadolu nashri xabar berdi.
Mahalliy OAV manbalari shahar nazorat ostida ekanligini eʼlon qilgan bo‘lsada, hukumat bu borada hali biror bayonot bermagan.
Lalibela shahri sayyohlik agentligi gidi Abiy Tesfakiros isyonchilar shaharga to‘qnashuvsiz kirganini aytgan. Shuningdek, banklar, maktablar va shifoxonalar kabi muhim binolarni o‘z nazoratiga olganini ham taʼkidlagan.
Isyonchilar bir necha haftadan buyon shaharlarni egallab olish bo‘yicha ancha oldinga siljigan.
1978 yilda UNESSO Butunjahon merosi ro‘yxatiga kiritilgan Lalibela shahriga XII asr oxirida Efiopiya qiroli Lalibela tomonidan asos solingan. Shahar “Ikkinchi Quddus” nomini olish uchun qurilgan Lalibela cherkovlari bilan mashhur. Chunki bu joyga efiopiyaliklar ziyoratga keladi.
Efiopiya armiyasi 2020 yil noyabr oyida isyonchilarga qarshi boshlangan operatsiyada qisman muvaffaqiyat qozongan. Shunday bo‘lsada, gumanitar vaziyatni bahona qilib, 28 iyun kuni Tigray poytaxti Mekelle shahridan chiqib ketgan.
Akram Hamraqulov
