O‘zbekiston Respublikasi Prezidentligiga uchinchi nomzod eʼlon qilindi

 

 

O‘zbekiston «Milliy tiklanish» partiyasining 6 avgust kungi navbatdan tashqari plenumida 2021 yilgi prezidentlik saylovida partiya rahbari Alisher Qodirovni nomzod sifatida ko‘rsatish masalasi muhokama qilindi.

 

Plenum davomida partiyaning bugungi kundagi yetakchisi Alisher Qodirov nomzodi partiya qurultoyida nomzod sifatida ilgari surish taklifi bildirildi. So‘zga chiqqanlar bu taklifni bir ovozdan maʼqulladi.

 

Endilikda nomzod partiya qurultoyida maʼqullanishi kerak.

 

 Tadbir davomida Alisher Qodirov so‘zga chiqib, partiya bu saylovda shunchaki qatnashmayotganini taʼkidlagan.

 

«Biz bu saylovga shunchaki kirmayapmiz. Bizning xalqqa aytadiganlarimiz bor. Biz bu saylovda muvaffaqiyatli qatnashmoqchimiz», degan u.

 

Maʼlumot uchun, Alisher Qodirov 1975 yilda tug‘ilgan. 1996 yilda Egey universitetini (Turkiya), 2009 yilda Toshkent moliya institutini (sirtdan) va 2011 yilda O‘zbekiston Prezidenti huzuridagi Davlat boshqaruvi akademiyasini tamomlagan.

 

Alisher Qodirov muqaddam Respublika Maʼnaviyat va maʼrifat markazi rahbari bo‘lgan (2015 yildan Qonunchilik palatasi deputati). U 2019 yilning may oyida partiya raisligiga saylangandi.

• O‘zbekiston prezidenti saylovi kampaniyasiga 23 iyul kuni start berildi. Saylovlarda 5 ta partiya – “Adolat” SDP, «Milliy tiklanish» DP, O‘zLiDeP, XDP va O‘zbekiston Ekologik partiyasi o‘z nomzodini ilgari surish huquqiga ega. Saylov 24 oktyabr kuni bo‘lib o‘tadi. 

• Qonunchilikka ko‘ra, partiya yuqori organi uning nomzodini maʼqullashi, Respublikadagi jami saylovchilarning kamida 1 foizi nomzodni qo‘llab-quvvatlab imzo qo‘yishi kerak bo‘ladi.

• Bundan oldinroq, Ekopartiya prezidentlik saylovi uchun partiya raisi Narzulla Oblomurodov nomzodini, “Adolat” sotsial-demokratik partiyasi ham partiya siyosiy kengashi raisi Bahrom Abduhalimov nomzodini tavsiya etgandi.