6-sinfdan aʼlo bahoga o‘qigan va xulqi yaxshi bo‘lgan o‘quvchilar OTMga imtihonsiz kirishi mumkin
Bu haqda xalq taʼlimi vaziri Sherzod Shermatov maʼlum qildi.
Vazir so‘zi davomida tavsiyanoma kimlarga berilishi mumkinligiga to‘xtaldi.
«Bolaning taqdiri nimaga faqat bir kun bilan hal bo‘lib ketishi kerak? Kelinglar, maktab bitiruvchilarining qanchadir foizini, masalan, 6-sinfdan buyog‘iga yaxshi o‘qigan, xulqi yaxshi bo‘lgan bolalarga (tavsiyanoma — tahr.) beraylik degan vazifa qo‘yildi», — dedi u.
U shuningdek, tanganing ikkinchi tomoni borligiga ham eʼtibor qaratdi.
«Bu vazifaning ikkinchi tomoni — ertaga maktabda qanday qilib potensial korrupsiyaning oldini olamiz, degan masala bor. Hozir elektron kundalik qilishimizning sababi ham oxirida mana bu bolani aʼlochi qilib chiqarishimiz kerak, deb baholarni tuzatib chiqa olmasligi uchun arxiv bizda tursin, deyapmiz», — dedi Sherzod Shermatov.
