Afg‘oniston: “Tolibon” yana ikkita shaharni egalladi
“Tolibon” harakati Afg‘oniston shimolidagi Qunduz va Toliqon shaharlarini ham egallaganini maʼlum qildi.
Bu haqda harakat vakili Qori Said Xostiy xabar berdi.
Ijtimoiy tarmoqlarda Toliqon markazida “Tolibon” bayrog‘i o‘rnatilgan rasmlar tarqaldi. Afg‘oniston ommaviy axborot vositalari maʼlumotlariga ko‘ra, hukumat kuchlari Qunduz aeroportini o‘z qo‘lida saqlab turibdi, ammo shaharning qolgan barcha muhim obyektlari jangarilar qo‘liga o‘tgan. Shuningdek, Sari-Pul shahri ham “Tolibon” tomonidan egallangani maʼlum qilindi.
Mamlakat shimolida vaziyat keskinlashgani munosabati bilan bugun Afg‘oniston o‘zbeklari yetakchisi Marshal Abdulrashid Do‘stum mudofaa vaziri Bismilloxon Muhammadiy bilan uchrashdi. Unda Afg‘oniston shimoli va shimoli-sharqidagi viloyatlarda Qobul hokimiyatini tiklash masalasi muhokama qilindi.
“Tolibon” Hirotga hujumni davom etirmoqda. Viloyat gubernatori matbuot kotibi Farhod Jiloniyning maʼlum qilishicha, so‘nggi bir kun davomida 12 jangari Hirot ostonasida yo‘q qilingan. Shaharda hukumat kuchlari va mahalliy qurolli guruhlar “Tolibon”ga qarshi kurashmoqda.
Afg‘oniston Mudofaa vazirligi 8 avgust kuni jami 572 jangari yo‘q qilinganini maʼlum qildi. Jumladan, Lashkargohda “Tolibon” qo‘mondonlaridan biri Mavlavi Hijrat va “Al Qoida”ning uch nafar pokistonlik aʼzosi halok bo‘lgan.
Bundan avval AQSHning B-52 samolyotlari jangarilarga aviazarbalar berganini xabar qilingan edi.
