AQSH O‘zbekistonga qiymati 330 ming dollardan ziyod bo‘lgan tibbiy niqoblar yubordi
9 avgust kuni Global Jewish Assistance and Relief Network (AQSH) jamg‘armasi tomonidan beg‘araz yordam sifatida taqdim etilgan tibbiy niqoblarining birinchi qismi O‘zbekistonga keltirildi, deb xabar beradi “Dunyo” agentligi.
Hozirda umumiy qiymati 330 ming dollardan ziyod bo‘lgan qariyb 270 ming dona tibbiy niqoblarning 134 ming 400 donasi olib kelingan. Undan 165 ming donadan ortiq N95 respiratorli niqoblar, 4 ming dona KN95 va 100 ming dona uch qavatli niqoblar o‘rin olgan.
Taʼkidlanishicha, gumanitar yordam respublikada koronavirusning yangi to‘lqini sabab kuzatilayotgan ehtiyojni qondirishda ko‘mak maqsadida yuborilgan.
Qayd etilishicha, ushbu insonparvarlik yukini O‘zbekistonga yuborish xarajatlari Pensilvaniya shtati Filadelfiya shahrida tadbirkorlik faoliyatini olib borayotgan o‘zbekistonlik Furqat Rajabov hisobidan qoplangan.
«Butun yer kurrasini qamrab olgan koronavirus pandemiyasi bilan bog‘liq vaziyat hech birimizni befarq qoldirmaydi. AQSH jamg‘armasi tomonidan taqdim etilgan tibbiy niqoblarning dastlabki turkumini yurtimizga yuborishga hissa qo‘shganimizdan mamnunmiz», — deydi Rajabov.
«Tibbiy niqoblar o‘rnatilgan tartibda respublikaning tegishli tibbiyot muassasalari o‘rtasida tarqatiladi. Shuningdek, niqoblarning ikkinchi turkumi ham tez kunlarda O‘zbekistonga olib kelinadi», — deyiladi xabarda.
