“Tolibon” yana bir viloyat markazini egalladi
“Tolibon” Farah viloyati markazi Farah shahrini ham bosib oldi. Bu haqda harakat rasmiy vakili Zabihullo Mujohid xabar berdi.
Shuningdek, Bag‘lon viloyati markazi Puli Humri shahri ham jangarilar qo‘liga o‘tdi. Hukumat kuchlari shahar tashqarisidagi Kelagay aholi punktiga chekingan. Zabihullo Mujohidning maʼlum qilishicha, Puli Humridagi barcha muhim obyektlar “Tolibon” nazoratiga o‘tgan. Shahardagi harbiy harakatlar tufayli 2 ming oila yashash joyini tashlab ketishga majbur bo‘lgan.
Bundan tashqari jangarilar Badaxshon viloyati markazi Fayzobod shahrini ham egalladi. Fayzobod so‘nggi bir sutka davom etgan hujumlardan so‘ng “Tolibon” nazoratiga o‘tdi.
Marshal Abdulrashid Do‘stum 10 avgust kuni bir guruh harbiylar bilan Mozori Sharifga qaytdi. So‘nggi kunlarda “Tolibon” Mozori Sharifga hujumni kuchaytirdi. Ushbu shahar Afg‘oniston shimolidagi muhim strategik hudud hisoblanadi.
Bundan avval “Tolibon” hukumat mamlakatdagi vaziyat ustidan nazoratni qo‘ldan chiqarganini maʼlum qilgan edi.
