Bankni o‘marishning antiqa usuli pand berdi
67 yoshli Alan Sletteri bankni o‘marishga qaror qildi, lekin xunuk husnixati tufayli ilk rejasi chipakka chiqdi.
Uning rejasi oddiy edi: bankka kirib, kassadagi qizga pul berish to‘g‘risida yozilgan qog‘oz parchasini uzatishi, uni o‘qigan qiz qo‘rqqanidan pul berishi, u esa pulni shu tarzda olib ketishi kerak edi. Nega u bunday yo‘lni tanladi? Chunki bank xodimlari bunday vaziyatda vahima ko‘tarolmas, o‘g‘ri qurollangan bo‘lishi va kimgadir zarar yetkazishi mumkin, deb o‘ylashlari mumkin edi. Kuzatuv kameralaridan esa uni karantin qoidalari, aniqrog‘i, niqob himoya qila olardi.
"Sizning to‘siqlaringiz mendagi narsani to‘xtatib qololmaydi. Shunchaki so‘raganimni bering, mijozlaringizni o‘ylang", — deb yozilgan edi qog‘ozda. Ammo bank kassiri bosqinchining yozuviga tushunmadi. Qog‘ozni olgan kassir undan: “ Kechirasiz, tushunmadim, bu nima deganingiz?”, — deb so‘raydi. Biroz noqulay suhbatdan so‘ng Sletteri ortiga qaytib ketishga majbur bo‘ladi.
Bank xodimlari yozuvni keyin o‘qishgan va polisiyaga xabar berishgan.
Chol shu bilan taslim bo‘lmaydi: ikkinchi bankka borib, shu qog‘ozi bilan pul talab qiladi va 2,4 ming funt o‘marishga erishadi. Ammo uchinchi marta bu usuli pand beradi: bank xodimlari zudlik bilan polisiya chaqiradi. Buning natijasida keksa bosqinchi olti yilga yaqin umrini panjara ortida o‘tkazadigan bo‘ldi.
Sharofat Mahmudova
