O‘zbekiston Qatarda “Tolibon” harakati bilan muzokara o‘tkazdi
O‘zbekiston, Turkmaniston va Rossiya diplomatlari Qatarda “Tolibon” harakatining siyosiy masalalar bo‘yicha komissiyasi rahbari bilan muzokara o‘tkazdi.
Bu haqda “Parstoday” xabar berdi.
“Tolibon” harakati vakilining matbuotga bildirishicha, harakat yetakchilaridan biri mulla Abdul G‘ani Baradar Qatarda Turkmaniston tashqi ishlar vazirining o‘rinbosari Vepa Xadjiyev va O‘zbekiston prezidentining Afg‘oniston bo‘yicha maxsus vakili Ismatulla Irgashev bilan uchrashgan. Bu uchrashuvda tomonlar Afg‘onistondagi vaziyatni muhokama qilishgan.
Harakat vakili Zabihulloh Mujohid uchrashuvda mintaqaviy masalalar, jumladan, Afg‘oniston va Markaziy Osiyo respublikalari o‘rtasidagi savdo muhokama qilinganini taʼkidlagan. Mulla Abdul G‘ani Baradar va Xojiyev, shuningdek, ikki tomonlama munosabatlar, chegara muammolari, iqtisodiy loyihalar va Turkmanistonning Afg‘onistondagi diplomatik vakolatxonalari xavfsizligi masalalari yuzasidan fikr almashgan.
Bundan tashqari, “Tolibon” harakati vakili Soheil Shohin o‘zining Twitter sahifasida Mulla Abdul G‘ani Baradar Rossiya prezidentining Afg‘oniston bo‘yicha maxsus vakili Zamir Kabulov bilan Afg‘oniston masalasini ham muhokama qilganini qayd etgan.
