Dunyodagi eng baland vulqon yana yuqoriladi
Yevropadagi eng baland vulqon — Sitsiliyadagi Etnaning balandligi 30 metrga oshdi. Bu haqda «Daily Mail» xabar berdi.
Maʼlum bo‘lishicha, Etna Yevropadagi eng faol vulqon bo‘lib, u har yili juda ko‘p miqdorda lavalar chiqaradi. Mazkur lavalar 108 qavatli osmono‘par binoni qurish uchun yetarli bo‘ladi. Taʼkidlanishicha, muntazam otilishlar tufayli vulqon qariyb o‘ttiz metrga oshgan. Hozirga kelib uning balandligi dengiz sathidan taxminan 3357 metrga yetgan.
Taʼkidlanishicha, 700 ming yil avval paydo bo‘lgan Etna Gavayidagi Kilauyea tog‘idan keyin Yerdagi ikkinchi eng faol vulqon hisoblanadi. U Afrika va Yevrosiyo tektonik plitalari o‘rtasida joylashgan bo‘lib, doimiy otilishlarni keltirib chiqaradi. Etna har yili o‘n million tonnadan ortiq lava va 7 million tonnadan ortiq karbonat angidrid, suv va oltingugurt dioksidi sepadi.
Etna vulqonining eng kuchli otilishi 1669 yil 11 martda sodir bo‘lgan. Mazkur portlash ko‘plab zilzilalarni keltirib chiqargan. Qayd etilishicha, o‘shanda vulqon otilishi natijasida 60–100 ming atrofida odam halok bo‘lgan. Vulqon oxirgi marta 2021 yil 17 fevralda uyg‘ongan
