Kobulning qulashida Afg‘oniston rasmiylari aybdor—Jozef Bayden
16 avgust kuni AQSH prezidenti Jozef Bayden Oq Uyda Afg‘onistondagi vaziyat yuzasidan bayonot berdi.
Prezident o‘z nutqi avvalida Afg‘onistondan qo‘shinlarni olib chiqayotganidan afsuslanmasligini maʼlum qildi. Shuningdek, AQSHning maqsadi Afg‘onistonda davlat qurish emas, balki Amerika hududiga bo‘ladigan teraktlarning oldini olish bo‘lgan, bunga esa erishildi.
Shuningdek, Bayden hukumatning mag‘lub bo‘lishida Afg‘onistonlik rasmiylarning o‘zi aybdorligini taʼkidladi. “AQSH afg‘on qo‘shinlariga hamma narsa berdi, ammo g‘alabaga bo‘lgan ishonchni singdira olmadi”, - deb aytib o‘tgan Bayden. Shu sababli afg‘onlarning o‘zi jang qilishni istamagan urushda AQSH harbiylari halok bo‘lishi maqsadga muvofiq emasligi qayd etildi.
Bundan tashqari AQSH prezidenti Afg‘oniston xalqini qo‘llab-quvvatlashda davom etishini maʼlum qildi. Shu maqsadda qochqinlarga 500 million AQSH dollari miqdorida yordam ajratiladi.
15 avgust kuni “Tolibon” Kobulni egalladi va Afg‘onistondagi hokimiyatni o‘z qo‘liga oldi. AQSH Afg‘onistondagi elchixonasi va tarafdordlarini evakuatsiya qilish maqsadida qo‘shimcha harbiy kuch jalb etgan. Mamlakatda vaziyat keskinlashuvi ortidan 16 avgust kuni Kobul aeroportida tartibsizliklar yuzaga kelgan.
Jahongir Qo‘ziyev
