O‘zbekistonda ko‘proq qaysi soha xodimlari majburiy mehnatga jalb qilingani maʼlum bo‘ldi
Senatda 18 avgust kuni Odam savdosiga va majburiy mehnatga qarshi kurashish milliy komissiyasining navbatdagi yig‘ilishida 6 oy ichida ko‘proq qaysi soha xodimlari majburiy mehnatga jalb qilingani aytildi.
Bu haqda Senat axborot xizmati xabar berdi.
Maʼlum bo‘lishicha, Mehnat inspeksiyasi tomonidan joylarda xodimlarni o‘z funksional vazifasiga kirmaydigan ishlarga jalb etish bo‘yicha 41 ta holat aniqlangan. Sohalar kesimida aytganda, majburiy mehnat holatlarining aksariyati xalq taʼlimi, bank-moliya, tibbiyot, transport va obodonlashtirish sohalarida uchragan.
Yig‘ilishda 2021 yilgi paxta yig‘im-terim mavsumida majburiy mehnatga yo‘l qo‘ymaslik, mehnat munosabatlarini to‘g‘ri rasmiylashtirish, terimchilar uchun munosib mehnat va dam olish sharoitlarini yaratish borasida amalga oshirilishi lozim bo‘lgan masalalar ham muhokama qilingan. Shuningdek, masalalar yuzasidan Milliy komissiyaning tegishli qarori qabul qilinib, kelgusidagi vazifalar belgilab olingan.
