AQSH qo‘shinlari harbiy missiya tugaganidan keyin ham Afg‘onistonda qolishi mumkin
AQSH qo‘shinlari harbiy missiyasi tugashi kerak bo‘lgan kundan keyin ham amerikaliklarni evakuatsiya qilish uchun Afg‘onistonda qolishi mumkin. Bu haqda “ABC” telekanali maʼlum qildi.
Missiya 31-avgust kuni yakunlashi belgilangan. Hozir Afg‘onistonda evakuatsiya qilinishi kerak bo‘lgan 10-15 mingga yaqin amerikalik bor. Shuningdek, Qo‘shma Shtatlar 65 mingga yaqin afg‘onlarni olib chiqishni rejalashtirilmoqda. Prezident Jo Baydenga ko‘ra, hozirda toliblar amerikaliklarni mamlakatdan olib chiqish uchun yordam berishda hamkorlik qilmoqda, biroq AQSH bilan bog‘liq afg‘on fuqarolarini evakuatsiya qilishda qiyinchiliklar mavjud.
O‘z navbatida, Pentagon amerikaliklarni aeroportga olib borishda muammolar borligini bildirdi.
Hamid Karzay nomidagi xalqaro aeroportda AQSH armiyasining 5 mingga yaqin shaxsiy tarkibi bor.
AQSH harbiylari obyektni qo‘riqlab, chet elliklar va afg‘on fuqarolarini evakuatsiya qilishni nazorat qilmoqda. Operatsiyada 80 ga yaqin harbiy transport samolyoti ishtirok etyapti. Pentagon maʼlumotlariga ko‘ra, bu samolyotlar har kuni mamlakatdan 5 dan 9 minggacha odamni olib ketishi mumkin.
Nasiba To'xtayeva
