“Tolibon” harakati Afg‘oniston Islom Amirligi deklaratsiyasini eʼlon qildi
“Tolibon” harakati Afg‘oniston Mustaqillik kuni munosabati bilan deklaratsiya eʼlon qildi.
Bu haqda harakatning rasmiy vakili Zabihulloh Mujohidga tayanib, “TASS” xabar berdi.
U o‘zining Twitter tarmog‘idagi sahifasida «Britaniya hukmronligidan mustaqillikning 102 yilligi munosabati bilan Afg‘oniston Islom Amirligining eʼlon qilinganligi» haqidagi hujjatning havolasini joylashtirgan.
«Afg‘onlar o‘z mamlakatining bugun Amerika istilosidan mustaqil bo‘lish arafasida ekanidan faxrlanadi. Bu ilohiy neʼmatdir, buning uchun barcha afg‘onlar minnatdor bo‘lishi kerak. Biz mamlakatimizda islomiy tizim manfaatlari yo‘lida, shuningdek, qayta qurish va davlatning gullab-yashnashi uchun birdamlik va samimiylik bilan ishlashimiz kerak», — deyiladi hujjatda.
«Bundan bir yuz ikki yil oldin Afg‘oniston mujohidlari (ozodlik kurashchilari) sakson yillik qarshilik natijasida Britaniya mustamlakachiligidan mustaqillikka erishdi. Bu asrning eng buyuk hodisasi hisoblanadi», — deyiladi “Tolibon” harakati bayonotida.
Avvalroq “Tolibon” harakati biometrik maʼlumotlarni aniqlovchi texnikani qo‘lga kiritgani aytilgandi. Shuningdek, “Tolibon” harakati Afg‘oniston kelajakda qanday davlat bo‘lishini maʼlum qilgan.
