«Tadbirkor dardi bilan yashamagan rahbarlarga bizning safimizda o‘rin yo‘q» – Shavkat Mirziyoyev
Tashabbus ko‘rsata olmaydigan, yangi-yangi g‘oyalarni ko‘tarib chiqishga, o‘zgarish qilishga intilishi bo‘lmagan rahbarlarga nisbatan juda qattiq talab va choralar bo‘ladi. Bu haqda ayni paytda Prezident Shavkat Mirziyoyevning tadbirkorlar bilan bo‘lib o‘tayotgan ochiq muloqotida so‘z yuritildi.
«Bugun ilk bor mutlaqo yangicha formatda – ‘ochiq muloqot‘ shaklida sizlar bilan yuzma-yuz uchrashib, biznes sohasidagi muammo va masalalar haqida, batafsil gaplashib olishga qaror qildik. Xabaringiz bor, kambag‘allikni qisqartirish, ‘mahallabay‘ ishlab, joylarda o‘sish nuqtalarini aniqlash, ishsizlikni kamaytirish, aholi daromadlarini oshirish bo‘yicha, katta marralarni belgilab olganmiz.
Bu borada, davlat idoralari va xizmat ko‘rsatuvchi barcha tashkilotlar, tadbirkorlar bilan har kuni yaqin hamkorlikda ishlashlari va ularga amaliy yordam ko‘rsatishlari shart. Bugungi muloqotga tayyorgarlik davrida, ko‘plab savol va takliflar tushgani sababli, murojaatlarning qabul muddatini 1 avgustdan 10 avgustga qadar, yaʼni 10 kunga uzaytirishga majbur bo‘ldik», — deydi Prezident.
Taʼkidlanishicha, tadbirkorlardan 15 mingdan ortiq savol, taklif va tashabbuslar kelib tushgan, shu kungacha joylarda ularning ko‘pchiligi hal etilgan.
«Ayniqsa, Andijon, Namangan va Surxondaryoda ishlar tizimli tashkil qilinib, tadbirkorlarimizning 90 foiz muammolari qisqa fursatlarda hal qilib berilgani, albatta, quvonarli hol. Qayerda muhit yaxshi bo‘lsa, hudud va tarmoq rahbarlari Prezident talabini to‘g‘ri tushungan bo‘lsa, o‘sha yerda ishlash uslubi, tadbirkorlarga munosabat o‘zgargan.
Aksincha, tadbirkor dardi bilan yashamagan, ular ko‘targan muammolarning ichiga kirmasdan, ko‘mak bermagan rahbarlar faoliyatiga esa xalqimizning o‘zi baho beradi va bunday rahbarlarga bizning safimizda o‘rin yo‘q va kelajakda ham shunday bo‘ladi.
Bir narsani barchamiz aniq tushunib olishimiz lozim. Tadbirkorlarimizning ushbu murojaatlari, amaldagi islohotlarimiz ko‘zgusidir. Shu bois, har bir vazirlik va idora rahbari, viloyat, tuman va shahar hokimlari kelib tushgan murojaatlarni o‘zlarining faoliyatiga baho deb bilishlari, bundan to‘g‘ri xulosa chiqarib, keskin o‘zgarishlar qilishlari zarur va shart.
Tashabbus ko‘rsata olmaydigan, yangi-yangi g‘oyalarni ko‘tarib chiqishga, o‘zgarish qilishga intilishi bo‘lmagan rahbarlarga nisbatan juda qattiq talab va choralar bo‘ladi», deya taʼkidlagan davlat rahbari.
