Afg‘onistonda qolgan yagona yahudiy: uni bu yerda nima ushlab turibdi?
Afg‘onistondagi yahudiylar diasporasi ancha yillardan beri bir kishidan iborat.
Qolganlar mamlakatni allaqachon tark etgan.
Afg‘onistonda hokimiyat “Tolibon” qo‘liga o‘tgach, Zvulun Siman-tov AQSH va Isroildan mamlakatdan chiqib ketishda yordam berish bo‘yicha o‘nlab takliflar oldi. Ammo erkak har qanday yordamni rad etib, Afg‘onistondagi yagona sinagoga va yahudiylar qabristonini himoya qilishini bildirgan.
Ammo Mokorrishon portalining yozishicha, erkakning bu fidoiyligi faqat turmush o‘rtog‘i bilan ajrimga rozilik bermaslikdan iborat. Uning rafiqasi va qizlari allaqachon Isroilga ko‘chib ketgan.
Yahudiylarda nikohni bekor qilish jarayoni diniy qoidalar asosida amalga oshiriladi. Erining roziligisiz ayol ajrashgan hisoblanmaydi. Geta, yaʼni ajrim xatisiz nikoh saqlanib qolaveradi: erkak ham, ayol ham yangi oila qura olmaydi.
Odatda geta yozishdan bosh tortgan erkaklarga ravvinlar sanksiya eʼlon qiladi. Ammo bunday vaziyatda hech bir ravvin yurak yutib Afg‘onistonga kela olmaydi.
Siman-tovaga Kobulda ishlaydigan amerikalik diplomatlar ham taʼsir o‘tkazishga uringan, ammo erkak so‘nggi kunigacha Afg‘onistonda qolish fikridan qaytmadi.
Sharofat Mahmudova
