Ahmad Masʼud: “Biz butun Afg‘oniston uchun kurashyapmiz”
Ahmad Masʼudning fikricha, “Tolibon” tomonidan mustabid hukumat o‘rnatilishi turli inqirozlarga olib keladi. Bu haqda u BBC Persian nashriga bergan intervyusida aytib o‘tdi.
Masʼud mavjud nizoni muzokara va o‘zaro tushunish orqali hal qilish mumkinligini taʼkidladi. Shuningdek, Panjsher yetakchisi bo‘lajak hukumat masalasida fikr bildirdi. Xususan, u Afg‘onistonda inklyuziv hukumat tuzilishi lozimligini, mamlakatga odamlarni qaytishga undaydigan tizim yaratilishi zarurligini aytgan.
Siyosatchi “Qarshilik harakati faqat Panjsherda emas, boshqa viloyatlarda ham mavjud ”,-deya qayd etgan. Shu bilan birga Panjsherda butun Afg‘oniston o‘z qadriyatlari uchun kurashayotgani, viloyat aholisi toliblarga zarba berish uchun yetarli tajriba va imkoniyatlarga egaligi taʼkidlangan.
Masʼud otasi haqida gapirar ekan, Ahmadshoh Masʼud mamlakat konstitutsiyasida milliy qahramon sifatida kiritilmaganini, ammo Afg‘oniston fuqarolari qalbida shu siymoda qolganini aytgan.
Eslatib o‘tamiz, bundan avval Afg‘onistonda “Tolibon” barcha insonlar huquqini himoya qilishga vaʼda bergan edi.
Jahongir Qo‘ziyev
