Qozog‘iston mudofaa vaziri isteʼfoga chiqishga qaror qildi
Qozog‘iston mudofaa vaziri Nurlan Yermekbayev mamlakat janubidagi harbiy qism omborida sodir bo‘lgan portlashdan so‘ng isteʼfoga chiqish niyati borligini maʼlum qildi. Bu haqda “Interfaks-Ukraina” xabar bermoqda.
"Men Jambil viloyatidagi voqeadan so‘ng o‘z ixtiyorim bilan isteʼfoga chiqishga qaror qildim. Eng so‘nggi qarorni, albatta, davlat rahbari qabul qiladi", — dedi Yermekbayev.
Eslatib o‘tamiz, Qozog‘istonning Jambil viloyatidagi portlashdan so‘ng 60 ga yaqin kishi zarar ko‘rdi. Mahalliy aholi favqulodda holat hududidan ko‘chirildi, temir yo‘l qatnovi to‘xtatildi. Yong‘in sabablari o‘rganilmoqda.
Mudofaa vazirligi maʼlumotiga ko‘ra, omborda asosan muhandislik qurollari saqlangan. Yong‘in oqibatlarini bartaraf etish paytida to‘rt harbiy xizmatchi halok bo‘ldi.
Nasiba To‘xtayeva
